اجلاس میں متفقہ طور پر دھرنے کی تاریخ اور مقام کا فیصلہ کیا گیا اتفاق رائے سے مختلف کمیٹیوں کی منظوری دی گئی
گورنمنٹ دیال سنگھ گریجویٹ کالج لاہور میں مرکزی پے پروٹیکشن کمیٹی کا اجلاس ہوا۔ جس میں سات مارچ کے دھرنا کے حوالے سے حکمت عملی طے کی گئی۔ اجلاس میں لاہور ،گوجرانوالہ اور شیخوپورہ سے مرکزی کمیٹی کے اراکین شریک ہوئے۔جن میں جہانزیب ڈھلوں، اشتیاق جٹھول، ڈاکٹر سلیم، میڈم وجیہہ اور میڈم رابعہ موجود تھے۔ اجلاس کی صدارت مرکزی پے اینڈ سروس پروٹیکشن کمیٹی کے کنوینر چودھری غلام مرتضیٰ نے کی۔پنجاب پروفیسرز اینڈ لیکچررز ایسوسی ایشن کے مرکزی جنرل سیکرٹری صاحبزادہ احمد ندیم ، مرکزی نائب صدر خاتون فائزہ رعنا ، پی پی ایل اے سرگودھا ڈویژن کے صدر حافظ رمضان اور لاہور ڈویژن کے نائب صدر جاوید بھٹی خصوصی طور پر شریک ہوئے۔اس موقع پر اتحاد اساتذہ کے سینئر رہنما چوہدری غلام مصطفی بھی مدعو تھے۔لاہور کے ڈسٹرکٹ کوآرڈی نیٹر ناصر ادیب، حسن رشید، شوکت حیات، اظہر حسین، ضیاء المصطفی، شمائلہ حسین اور دیگر شرکاء بھی اجلاس میں شریک تھے اجلاس میں تمام شرکاء نے اتفاق راۓ سے طے کیا کہ دھرنا پنجاب سیکرٹریٹ کے سامنے دیا جائے گا۔ دھرنے کی مجوزہ تاریخ 7 مارچ کی حتمی منظوری دی گئی۔ دھرنے کے انتظامات اور دیگر امور کے لیے اتفاق رائے سے مختلف کمیٹیاں تشکیل دی گئیں۔ان کمیٹیوں میں مذاکراتی کمیٹی ، دھرنا مینجمنٹ کمیٹی ، فنانس کمیٹی اور میڈیا مینجمنٹ کمیٹی شامل ہیں۔
